***
اللهم صل و سلم على سيدنا محمد
صلى الله عليه و سلم
***
اليوم حبيت نقدم لكم صفحة تضامن
الصحبة الطيبة
و هذا عربون صغير للصداقة الصادقة
****
العضوات المعنيات :
فاطمة بشار
it’s me
سمراء الدنيا
اريج المسك
fati 17
*****
الصفحة الاولى خاصة بفاطمة بشار
تفضلو قولو بسم الله
***
مائدة العشاء
الطبق الرئيسي : دويدة مفورة
طبق السلطة : بيطراف + جزر مرابيين
***
طبق سلطة الفواكه : تفاح + بنان + مندرينة مقطعين
***
مائدة السهرة
***
شاي + عصير الليمون طبيعي 100/100
***
طبق : السفة للاخت الوهرانية 1
***
جنواز السيدة ام رامي + صابلي
يتبع…….
محجوووووووووووووووووز
محجوووووووووز
محجوووووووووووز
محجووووووووووووووووووووووووووز
بارك الله فيك عزيزتي فطيمة و الله يدومها محبة في الله
انا المولد قسمتو على يومين
اول ليلة عملت الثريد
و الصباح عملت الطمينة و الملوي مع لاتاي
و في الغدا عملت السفة باللبن
و لعشية رفيس و مقروط
و في الليل حمرت دجاجة
وللسهرة قلب اللوز و المكسرات
و شعلنا الشموع و السينيال و نشدنا البردة
و درت الحنة للبنات
طبعا راكو تشوفو الاطباق صورتها بالتخبية في الكوزينة
لاني لوكان نحط الطابلة يطيرو بيها هههه
اللهم ادمها نعمة و احفظها من الزوال
و كل عام و انتم بخير
الله يبارك راكم فحلات
السلام عليكم و رحمة الله تعالى و بركاته
ولد الهدى فالكائنات ضياء **********.. ***—– وفم الزمان تبسم وسناء
من عادات البساكرة في المولد اننا نطبخو البربوشة"الكسكسي" و نذوقو جيرانا
و لكن هاته الأعوام صار كل واحد وش يطيب الرشتة الشخشوخة القسمطينية و البسكرية التريدة
لكني هاد العام لما شفت قصعة الحاج لأختنا الوهرانية سخفت عليها موت و قلت نطيبها و نديرها فال لعل و عسى ربي يوصلني و نروح للحج و ممكن تستعجبو اني ماحطيتش الشموع و النوالات و هذا لأننا قاطعنا هاته البدعة هاد العام و اكتفينا بشمعة في الحنة فقط
و ياله نبداو بسم الله و الصلاة و السلام على رسول الله
جوزو عندي مرحبا و شوفو سينية العشاء
نبداو بمسفوف الوهرانية هو صح ما يشبهلوش تماما و لكن حاولت على قدر المستطاع
طبعا حطيت معاه اللبن و العسل "لكن بكل صراحة واحد ما كلاه بالعسل لأنه مش موالفين بيه"
و هاد بربوشة بسكرية بلحم المسلان و فخاذ الدجاج و البطاطا و الحمص و مداوية مليح مليح براس الحانوت الله الله و الفلفل الأحمر و لحتلها عود قرفة باش تطلق لحلاوة
و ربي يحلي اياماتنا و يهنينا و يسعدنا آمين
و هنا الشربة و كيما نسموها احنا البساكرة الجاري فريك و هي طبعا لحم تقليه مليح بالبصلة و سنينة ثوم و الزيت و التوابل الي هي راس الحانوت و الفلفل الأحمر و شوية نعناع و بعد ما تمرقي و يطيب اللحم و الحمص تلوحيلو الفريك و تخليه يكمل طيابو و تزينيه بالدبشة
بالنسبة للي تقول ما يجيهاش الفريك خاثر تلوحلو شوية دقيق الفريك كما يسموه القسمطينية الدقاق و نسموه احنا في بسكرة التكوكة و هو الفريك المرحي ارطب خلاص
و هنا تطبيقي لعزيزتنا فلة حرة الحراير الي جابتلنا المثوم المودارن 
و هو مثوم محشي بالزيتون
و سلاطة خفيفة بالبطراف و الجزر المكرفجين و البسباس رونديلات
و الديسار و الحمود الي ما تخطيناش و كيما قلتلكم اللبن للطعام تاع الحاج
اما العصير فصنعتو بالجزر ذوق خوخ و ذوق برتقال
و هو جزر نظفتو وغليتو مع قطرة ماء زهر و مغيرفة سكر و رحيتو في الميكسور بالماء المغلي فيه
نصفه درتلو عصير البرتقال
و النصف الآخر درتلو علبتين ياغورت خوخ و شوية عطر خوخ
و حطيتو مع سينية السهرة
و درت فيها صحنين الطمينة على طريقة والدة فايزة ربي يحفظهالها و يْرَضيها عليها
هادي ليا انا وحدي 
و هادي لبنيات الثلاثة
و في الوسط حطيت كريمة خدمتها بالنيسلي و هي خفيفة و بنينة
تضيفي لعلبة النيسللي 3 علب ماء"تكيلي بالعلبة تاع النيسلي" و 3 مغارف نشاء و تخليه على نار هادية مع التحريك لما يخثار و يعمل فقاعات يتسمى راهو طاب تنحيه من النار و تضيفيلو ماء الورد و تصبيه في غرفيات خاصين بالفلان و تزيني بالقرفة و البيسطاش
و خبزة تونس و هي تجي بكاس بيض كاس شابلور كاس لوز مرحي خشين و بقشورو كاس زبدة ذايبة "انا درتها بالزيت برك" و شوية فاني غير قيس ما تتنحى ريحة البيض و وحدة خميرة و تصبيه في سينية مدهونة
و ما بين ما طاب تكوني وجدتي الشربات خفييييييفة بكاس سكر و كاسين ماء على ما يطيب "مايديش وقت مثل الموسكوتشو" تسقيه بالشربات
و حطيت معاهم شوية مكسرات و لبلابي ملبس "اللبلابي حمص مطبوخ بطريقة معينة شكله حمص و هو هشوش خلاص"
و هاد السينية لحباباتي و كل من زارنا في صفحتنا
و هاد صورة المسجد القديم للصحابي الجليل عقبة ان نافع و ضريحه تحت القبة الباينة
و طبعا كل ما نروحو نزورو ضريحه نقعد نتخيل الحسنات الي ياخذها هذا الصحابي الجليل مع مولد كل مولود مسلم في المغرب العربي ان لم اقل افريقيا كلها
و المرة الجاية ان شاء الله نصورلكم المسجد الجديد و معهد الأئمة
ايا سلام و ما تنساوش تسمعونا السلام على الحبيب عليه الصلاة و السلام
الله الله ربي يبارك ويزيد فحلات
شاطرة الله يبارك الله يعاونك
الله يبارك يا فاتي شخشوخة و عليها الكلام
الله يبارك فحلات تع الصح والله موائد في القمة اختي اريج المسك شكرا على الثقة وخرجلك رائع بصحتك وكل الاطباق روعة وطريقة التقديم ايضا وفاطمة ايضا تفننت في الاطباق مشكورة الله يدوم صحبتكم بالطيب والهنا
والله روعة ماشاء الله زيدولنا هكذا نبينو بللي الجزائريات فحلات او نص