مرحبا أخواتي الأعزاء راني اليوم جبتلكم طريقة صنع المقروط من عند أمي الغالية و فيه كل الخطوات بالتفصيل ان شاء الله تستفادوا و الطريقة في الصور نتمنى الشرح يكون وافي و أي استفسار انا في الخدمة و لا تنسوا أمي بدعائكم الصالح
بسم الله على بركة الله
3 عبار سميد متوسط يجي كيما تاع الطمينة كا يكون خشين كيما تاع قلب اللوز ما يكون رقيق بزاف متوسط و عبرت بهاد الطبسي تاع الشوربة كبير
ثم انديرو نص مغرف صغيرة ملح و نص كاس سكر ( نعبر بكاس قازوز) و نزيدوا حفنة تاع فرينة ( الفرينة انديروها في حالة ما كان السميد خشين بزاف و ايذا كان عندك المتوسط انضيفلها نص حفنة فقط) و انخلطهم و نزيدولهم عبر واحد تاع زبدة ذايبة و ززيت ايجو نص نص في عبر واحد و بالاكو الزبدة يكون فيها الماء اشرو نوعية مليحة مثل لابال و انبسس مليح و انخليها اتبات ليلة كاملة و ايذا كنتي مقلقة يكفي 4 ساعات و في الصباح نلم الخليط بالماء و ماء الزهر و يكون الماء كثر من ماء الزهر حتة تولي عندنا عجينة طرية نتحكم فيها و نبلو غير قد حربوش ماشي كامل العجين و نعمس مليح بيديا باش يدخل الماء مليح نخليكم مع الصور
ثم انقسم العجين تاعنا و انديرو حربوش كيما هذا و نفتحوه في الوسط و انديرو داخلو العقدة على شكل حرابيش صغار ماما دارتها بالتمر و اندير فيها ايضا عقدة الكوكاو او اللوز ثم نغلق كما في الصور
ثم انحي الاطراف السكين من الجانبين
و انديرهم فوق الحربوش
و انعاودوا انشكلو حربوش و هاد المرة انطولوه و نستووه مليح
و انشكلو مقرروطات بطابع المقروط و هادوك الحواف اللي يزايدوا انحوهم و انديروهم مع العجين تاعنا و نستوي مليح اطراف الحبة تاع المقروط بيدينا و انديروها في زيت سخووووووووووون سخوووووووون و عبر ما يشد روحو واحد 3 دقايق و انقص على النار لانو الزيت ايلا كانت باردة المقروط ينحل و هاد العملية انديروها في الاول فقط لانو الزيت في المرة الثانية و الثالثة راه يكون بلا ما انزيدوا النار لانها تولي سخونة و هكذا حتى اتكملي كامل العجين اللي عندك
و هذا هوا اللون كي طاب ما نحمروهش بزاف راح يتعسل و يزيد لونه
و العسل انديروها على نار تسخن ثم انديرو فيها المقروط تاعنا سخون من المقلى للعسل ثم انديروه في كسكاس تحتو صحن باش يتقطر و في الغد انعاودو انعسلوه مرة ثانية و كي تروح تشربو بيه القهوة غدا من ذاك او يوم آخر تاني عسلي قيس ما راكي رايحة اتحطي
ملاحظات : لنجاح المقروط خليه يبات ليلة في البسوس تاعو و غدوة من ذاك بليه بالماء و ماء الزهر و ياش ايجيك معسل من الداخل مش ناشف اتعسليه فورا كي اتنحيه من المقلى و اتعسليه مرة ثانية في اليوم الموالي ايضا
و بالهناء و الشفاء
الله يبارك …..راني حابة نديرو كيما هادا ……..نجربو و نشوف انشاء الله شكرا
الله يعطيك الصحة
جايك هايل يعطيك الصحة
اممممممممممممم يشهي تسلمي
واحلى تقييم
|
المشاركة الأصلية كتبت بواسطة بسمة العمر
 الله يبارك …..راني حابة نديرو كيما هادا ……..نجربو و نشوف انشاء الله شكرا
|
و فيكي بارك الله اختي جربي و رديلي الخبر
|
المشاركة الأصلية كتبت بواسطة yakout01
الله يعطيك الصحة
|
تسلمي اختي
الله يبارك يبان يشهي
يعطيك الصحة
|
المشاركة الأصلية كتبت بواسطة سيرين15
جايك هايل يعطيك الصحة
|
الله يسلمك اختي هذا عمل امي
|
المشاركة الأصلية كتبت بواسطة *أم كوثر*
اممممممممممممم يشهي تسلمي
واحلى تقييم |
الله يسلمك اختي ام كوثر شكرا على التقييم
|
المشاركة الأصلية كتبت بواسطة ام بسومة
الله يبارك يبان يشهي
يعطيك الصحة |
شكرا على المرور الطيب اختي
يعطيك الصحة وربي يحفظلك الوالدة الكريمة
شحاااااال نبغي المقروظ ومايصلحش بالاك بطرقتك يصلحلي نقدر نديرو يطيب ف الفور نفس الطريقة
يعطيك الصحة
|
المشاركة الأصلية كتبت بواسطة ام دودة
شحاااااال نبغي المقروظ ومايصلحش بالاك بطرقتك يصلحلي نقدر نديرو يطيب ف الفور نفس الطريقة
يعطيك الصحة |
لالا ما يصلحش اختي مقروط الفور اللي احنا انقولولو مقروط الكوشة عندو وصفة اخرى عن قريب ان شاء الله راني انديرو و انحطولكم
|
المشاركة الأصلية كتبت بواسطة الصوامعية
يعطيك الصحة وربي يحفظلك الوالدة الكريمة
|
ششكرا اختي الصوامعية