شواط بني مسيل شخشوخة تقليدية مئة بالمئة 2024.

اول شيئ نوجد الشخشوخة واللي هي 2 كيلات دقيق بكيلة فرينة ملح

ونلمها بالماء مليح نغطيها بكيس ونخليها ممكن حتى تشمخيها في الليل وللصباح تستعمليها انا هنا شمختها الصباح وحتى للعشية باه طيبتها المهم من بعد ما تريح نعجنها مليح كيما لمسمن بلا تقطاع وكل مرة نرش بالماء حتى تطلق روحها نزيد نخليها ترتاح شوية

ثم نعمل كريات شوية كبار بمساعدة الزيت نغطيهم بكيس ونحط الطاجين نتاع لحديد يسخن على نار ذليلة نبدى الطياب طيابها شوية يختلف على المسمن العادي لانو رايحين نطيبوها بخليط من الماء والزيت

ولما نطرحها رايحة تكون شوية خشينة

كل ما طيبي واحدة راح تشوفيها بلي انتفخت شوية هاذا يعني راهي ناجحة وحتى انها راح تشكل زوج طبقات منفصلين

نرش عليها الزيت اللي مخلط مع الماء واللي اكيد طرحناها بيه
لازم تلوحي واحدة طيب وفي نفس الوقت فتي الاولى اللي طابت على خاطر تجيك اسهل للتفتات وهي سخونة

بعد ما تكملي طياب وتفتات لوحيها تفور مليح مرة واحدة تكفي
وجدي المرق نتاعك
من الاحسن نستعمل الدجاج
2 حبات بصل مرحيين ثوم مرحي
هاذ الشخشوخة تحب الطماطم نتاع الحب يعني 3 حبات كبار طايبين من قبل ومرحين في الرحاية اليدوية 2 م ك طماطم مركزة زيت ملح افاك فلفل اسود وفلفل احمر حلو 1 م ك هريسة نقلي هاذ الخليط مليح مليح قد ما تقلي تجيك بنين على راي ام ياسين السر في البنة هو التقلية لمليحة

من بعد لوحي الخضر نتاعك بشرط حبة بطاطا قطعيها عادي و2 او 3 حبات بطاطا متوسطين الحجم خليهم هكذاك من بعد نقلك لوحي الحمص نتاعك اللي اكيد ره طايب من قبل نصف طياب

وامرقي بالماء واغلقي لاكوكوت نتاعك وخلي كلش يطيب

لما يطيبلك الدجاج والخضر نتاعك نحي البطاطا اللي خليتيها حبات ثم ارحيها في الرحاية اليدوية مباشرة في المرق راح تمدلو ثقل وبنة رائعة

فرغي المرق نتاعك في قدر اخر وخلي الخضر بجيه
حطي على النار ولما يغلي لوحي الشخشوخة نتاعك تتجمر في المرق لوحي معاهم طرف صغير زبدة وهاذ الشخشوخة بالذات فيها زوج حوايج لازمين وضروريين باه جيك بنة حقيقتا هباااااال
البصل الاخضر المقطع الى مكعبات صغار وطرف دهان لوحيهم في الشخشوخة وهي تتجمر وحركي مليح بملعقة خشبية وزيدي المرق اذا احتاجت

ثم طفي النار وغطي عليها 5 او 10 د وقدميها بالصحة والهناء مع طاس لبن امممممم
راهي عن جد لذيذة وتختلف شوية على الشخشوخة اللي متعودين عليها