حطة الصينية

مساء الخير ،أردت أن أطرح هذا الموضوع للنقاش،و قد سبق و أن أشارت الأخت أم دودة اليه في موضوعها حول الضيوف،لكن لم يتم النقاش حول ما يقدم للضيف
من عادتنا عند تقديم شئ للضيف، أن نحضر ما سيتم صبه من مشروب و معه الكؤوس في صينية،او القهوة و الحليب أو الشاي في ترامس و يتم صب المطلوب أمام الضيف,لكن لاحظت مِؤخرا ان العديد من النساء يحضرن العصير مصبوب واجد في الصينية وحتى مؤخرا القهوة بالحليب مصبوبة واجدة،اصدقكم القول هذا لم يرقني،وليست مسألة اني أعاف لكن رأيت ذلك غير مقبول،فما رأيكن؟ و كيف تقدمن أنتن المشروبات؟

عندك الحق حبيبتي انا ثاني مانحبش كي نشوف هاذ اللقطة ههه
كيما انا نحب نكبر بضيافي و نستقبلهم مليح انا ثاني نحي نلقل نفس الشي نظاف و و كلش

لالا حببتي حنايا نجيبو كلش في الصينية وقدامهم نفرغولهم سوا قهوة و لاعصير ..
جديدة هادي تاع جيبولي القهوة مفرغة في الفجان شكون لي يضمنلهم بلي نشرب قهوة بالحليب هههههههههههههههه

والله هذا ما جعلني افتح الموضوع
علما انني لا أريد أن ندخل في متاهات الجهوية،لكن هذه اللقطة رأٍيتها مرارا حيث أعيش،على عكس عادات مسقط رأسي (الشرق)، طبعا دون تحديد المدن تفاديا للحساسيات
وما جعلني أتكلم هو أنها تكررت معي مرارا حتى ظننت أنها عادة جديدة،مرة في قهوة ختان،ومرة في قهوة نجاح ،و مرة اخرى في زيارة نافس ومؤخرا في زيارة مريض

السلام عليكن والله العادات الجديدة هبلتنا احنا احطوا كلشي قدام الضيف ونشاوروه باش نفرغوا قهوة او عصير لكن في المناسبات الكبيرة وكي تكون في الدار نسربوا صينية فيها قهوة كحلة واخرى بالحليب و في الصالات كل واحد يفرغ روحوا هههههههههه

والله عندك حق تجيبلك كلش مصبوب ماتدري واش مخلط معاه ههههههههههههههههههههه

شكرا اختى على الطرح بالنسبة لي هده للنساء الخايبات انا نشرب قهوة وحدها وكي يحطولي لي فيها الحليب نهرب من الطابلة وزيد ما عنديش كونفينس ههههههههههههههههههه رانى نضحك كي يكبوها من التارموس بسم الله ونشرب

شكرا أخواتي على التفاعل مع الموضوع
و الله أنا تاني حيرتني هذه العادات الدخيلة علينا
وكما قالت الأخت يمكن ان نرى هذه العادة و تكون مقبولة في اعراس لبيت
و ما اثار استغرابي ان المكلفة بالتسربية كانت تحسب من تشرب قهوة كحلة و من تشرب قهوة حليب ومن تشرب شاي برفع الأصابع،وكأنها نادل في مقهى ثم أخذت الطلبية و ذهبت لتجهيزها في المطبخ ،و عند احضار المشاريب لم تضع السكر لأنه برأيها عادة اذا أكل البعض الحلوى لا يرغبون في تسكير القهوة،ثم مرت علينا بالسكرية و كل واحد يأحذ القطع و يضعها في فنجانه، والله شربت حشمة برك ترهجت فيها
قد يظن البعض أنني أتمشرك لكن و الله والو،هناك عادات جميلة ترفع من قدر صاحب البيت و الضيف ،نتمنى ألا تزول،و أرجو أن يفيد الموضوع المقبلات على الزواج

مليحة هاذي تاع يرفعو صبعهم هههه
كون انا منشربش خلاص
حنا القهوة تجي مصبوبة غير فالوفاة
عادة مش مليحة
تبانلي تحطي من قدر الضيف كي تجيبي الحاجة مصبوبة

اقتباس:

المشاركة الأصلية كتبت بواسطة it’s me عندك الحق حبيبتي انا ثاني مانحبش كي نشوف هاذ اللقطة ههه كيما انا نحب نكبر بضيافي و نستقبلهم مليح انا ثاني نحي نلقل نفس الشي نظاف و و كلش

عندك الحق اختي بصح في منطقتنا كاين لي يديرها سورتو في لعراس تحياتي

السلام عليكم احنا مازالنا نجيبو صينية تاع لاتاي و الاخرى تاع الاقامة و تجي امرءة كبيرة تاع لوقر تعمر لاتاي قدامنا يعني طيبه وحنى نشوفو والاقامة تاع لاتاي توصل حتى 6ملاين لازم هاد الشي و كل واحد على حساب طاقتو بصح لازم لاتاي يتعمر قدامنا

ياخواتي واش راح نقلكم كاين ناس عرفهم على قدهم مايروحو مايشوفو على هاذيك يسربو بالطريقة هادي وكاين اللي ماعندوش شكون يوقفلو في عرسو مثلا عرس طفلة واحدة عند والداها شكون راح يوقفلها بالبرستيج
وبالنسبة للسكر احنا عندنا يتحط في بابي قلاصي ويتسربى وحده وكاين اللي تسكر اللي تسربي وتاع انه الانسان يروح مايعجبوش الحظ ياكل ولا مايكلش وكاين اللي ينقص الباروك هادي ترجع للناس اللي راكي رايحة ليهم اذا كانو زواولة ويتامى حتى اذا جابولي القهوة مسكرة وحطو طعام برك نزهى ونشطح ونمد الباروك المخير ونروح
اما حبيت نصقصي على العفسة تاع انك تحطي الباطا تاع الجي الطاس تاع الجي والكيسان في الصينية وقدام الضيف تصبي الباطا تاع الجي في الطاس وبعد تزيدي تصبي في الكيسان واش رايكم
انا نحب نصقصي باه ماتضحكش عليا الناس

اقتباس:

المشاركة الأصلية كتبت بواسطة زرقاء اليم مساء الخير ،أردت أن أطرح هذا الموضوع للنقاش،و قد سبق و أن أشارت الأخت أم دودة اليه في موضوعها حول الضيوف،لكن لم يتم النقاش حول ما يقدم للضيف من عادتنا عند تقديم شئ للضيف، أن نحضر ما سيتم صبه من مشروب و معه الكؤوس في صينية،او القهوة و الحليب أو الشاي في ترامس و يتم صب المطلوب أمام الضيف,لكن لاحظت مِؤخرا ان العديد من النساء يحضرن العصير مصبوب واجد في الصينية وحتى مؤخرا القهوة بالحليب مصبوبة واجدة،اصدقكم القول هذا لم يرقني،وليست مسألة اني أعاف لكن رأيت ذلك غير مقبول،فما رأيكن؟ و كيف تقدمن أنتن المشروبات؟

موضوع رائع يعطيك الصحة وعندك ألحق حتى أنا لا أحب وضع القهوة والعصير ونديلهم, هنا عندنا حتى فالأعراس كل طاولة عندها ترموس تعها
والأواني تع ضياف دائماً أحب غسلهم مرة أخرى قبل ما نحطلهم مع أنهم مغسولين ونضاف مي نقول On sait jamais
كلش يعدي غير تبهديلة لا

بصح يا أختي الناس عقليات مختلفة و كما قالت الاخت أم دودة كاين الناس زواولة بزاف ولا ميخالطوش ميعرفوش