السلام عليكم
من خلال موضوعي اريد منكم تخيل تفسكم في موقعي و اتخاذ القرار الصائب
انا فتاة مقبلة على الزواج ان شاء الله من مغترب ……..المشكلة اني تحصلت على وضيفة مرسمة بشهرية 8 ملايين سنتيم للشهر في الجزائر و كما تعرفون الغربة باوربا تبدلت و اصبحت اليوم عمل غدا لا……….
لو كنت في مكاني هل تلتحق بالزوج الى المهجر علما انه ادا ساءت حالة المهجر سنعود الى الجزائر صفر اليدين لانه مطرود من fonction publique فسيكون بطال في الجزائر و الخدمة صعيب باش تلقاها فالبلاد
ام ابقى في الجزائر و هو في المهجر فلي منزل في الجزائر ؟؟؟؟؟
علما اني لا استطيع دفع mise en dispo الا بعد 3 سنوات
راني حائرة ارشدوني من فضلكم
استخيري اختي والله يوفقك الى مافيه خير لك
بما انك قلتي ديري روحك في بلاصتي
انا على بالي بلي كثيرات يقولو ليك ما تخلي 8 مليون و خدمتك
لكن رايي الشخصي
حلقي الى زوجك:d
و ما تخممي في حاجه اخرى
لا تتشاءمي ان شاء الله ما تلقو حتى صعوبات
و تعيشي بالباهي مع راجلك
تحياتي
خدمة ب 8 ملاين فالشهر وزاد جاك راجل فليترونجي …هذا زهر ولا واش عندك .ههههه.اللهم لا حسد ..الله اعينك على هذا الحظ الكبير الي عندك.
اختي انا ننصحك بصلاة لاستخارة وذكر الله كثير وفي الاخير انا نقلك ديري واش يخرج عليك ولي معطتوش بلدو متعطيهش بلاد الناس الزوج صح اهم من العمل الى المراءة بصح في حالتك اظن بلي العمل احسن ليك من هذا الزوج وربي يقدم لي فيها الخير وكل شيئ بالمكتوب
لو انا في بلاصتك مع انو مستحيل نكون في بلاصتك مي خليني نتخيل
بكل بساطة مراحش نسمحل في خدمتى لانو ثابتة لكن زواج ماهوش ثابت قادرة تروحى للخارج ومتتفاهميش مع راجلك ترجعي للبلاد خاسرة كل شي من افضل ديري استخارة وربي يوفقك ويهينك
قصتك تشبه قصتي كثرا المهم بحكم أني مغتربة وكنت في الجزائر نخدم خدمة شابة بزاف يعني في 2024 كنت نخلص 25000 ورغم ذلك خليت خدمتي وتغربت وياليتني لم أفعل ومن سوء حظي أني ما دفعتش mis on dispo ولكن والله ندمت كتير أنا نقلك أتزوجي بيه اذا كان عجبك من كل النواحي طبعا ولكن ما تفرطيش في خدمتك يعني تبقي طالعة هابطة كل ما تسنح لكي الفرصة وحتى يجوزوا 3 سنين ديري العطلة غير مدفوعة الأجر كل 6 أشهر مش مرة وحدة ومن بعد انتوا تقروا وين تقعدوا اذا ساعدكم الحال في الخارج ولا فلبلاد ولا درتو تاويلكم كوني شاطرة وحاولي ما تفرطيش فيهم في زوج هههه
ادا خلاك راجلك تحبطي و تطلعي ماتخليش خدمتك ………و الا زوجك اولى
يا أختي مشكلتك حساسة شوية
بما أنكي لقيتي خدمة بـ 8 ملايين يعني عندك مستوى ومؤهلات جيدة فممكن تلقاي خدمة أخرى في المستقبل خصوصا وأنك تملكين منزل في الجزائر
وراكي تعرفي أن في الجزائر الفتاة عندها حظوظ أوفر من الرجل في التوظيف .
شوفي أنت إذا تحبيه وترتاحيله هذا الرجل . هل هو خدام وبشهرية ؟
إذا كان عاطل عن العمل فمن الأفضل تأخري الزواج لسنة أو سنتين حتى تعرفي العقلية جيدا وهل أنت قادرة على التنازل
صلي صلاة الإستخارة فما خاب من إستشار ربه
إن كان هذا الرجل فعلا يستحق كل هذه التضحيات….فلا تنظري الى الخلف.
اذا كان ذو خلق و دين ماتفرطيش فيه لان الخير ماتعرفيهش مين يجي نتي راكي عارفاه كيفاه و عارفة احوالو و ربي يوفقك….بصح آستخيري احسن
الإستخارة أولا لأن هذا امر لا نقاش فيه
و إن شاء الله ربي يسعدك اختي الكريمة في أي رأيي تتخذينه
الغربة في بلد أجنبي صعيبة جدا جدا جدا خاصة بالنسبة لتربية الأبناء،،،،،،،،،،،،،،،،،، خلي زوجك يرجع للجزائر و أكيد إذا كان جادا في البحث عن العمل فسيجد عملا لا محالة .
اكيد كيما راهم يقول الاستخارة اولا
لكن انا لو كنت في بلاصتك ما نفرطش في خدمتي خصوصا بهذا المرتب
ممكن اذا كان الشخص هذا يهمك ياسر ومتعلقين بعضاكم تتزوجوا وتبقي هنا
تخدمي على روحك واذا ما وفقش فهو فعلا انسان مصلحجي ويفكر غير في روحوا
ابقي هنا وتمسكي بخدمتك وكي تشوفي الامور مضمونة في الخارج ثمة تكون الهدرة
عندك لا يجرالك سيب ما فيدك وتبع ما في الغار
|
المشاركة الأصلية كتبت بواسطة مشكلتي
 السلام عليكم
من خلال موضوعي اريد منكم تخيل تفسكم في موقعي و اتخاذ القرار الصائب انا فتاة مقبلة على الزواج ان شاء الله من مغترب ……..المشكلة اني تحصلت على وضيفة مرسمة بشهرية 8 ملايين سنتيم للشهر في الجزائر و كما تعرفون الغربة باوربا تبدلت و اصبحت اليوم عمل غدا لا………. |
شهرية 8 ملايين الله يبارك يعني انت اطار سامي في الدولة كيف تقبلين ان تهانين في بلد الغربة وتخلي 8 ملايين الناس تتمنى ان تعمل في الجزائر ب2 ملايين وانت تريدين الهجرة برغم من راتبك المغري