السلام عليكم
نصيحة لمن تود الزواج خارج ولايتها
اختي حبيت نقولك انو الزواج مكتوب ربي لكن اذا كتبلك الزواج خارج ولايتك وبعيد على اهلك مسافة بعيدة وسواء سكنتي مع زوجك فقط او كان اهل زوجك معاك لكن مايعاملوكش مليح ا او مافيهمش رحمة ربي عرفي الاتي
نهار تمرضي تلقاي روحك وحدك وواحد مايسقسي عليك كليتي او ماكليتيش
نهار تتوحمي تسخفي على طبسي ماكلة يجيك سخون على غفلة لكن للاسف ماكانش لي يجيبولك
نهار تولدي ماكانش لي يقوم بيك في نفاسك او حتى يطل عليك
يعني تقريبا راح تجيك اوقات تكرهي اليوم لي تزوجتي فيه خارج ولايتك وبعيد على اهلك
اليكم التعليق
je confirme ma cherie
راكي قلتي كل شئ حبيبتي
اكديلي على المرض تمرضي حتى واحد مايطل عليك بالعكس يطلو يزيدولك الوجع والستر
ولكن الزواج مكتوب ربي
الحمد لله على كلشيء
صحيح أختي و الله هذا مشكل و أنا اعترض على هذا و ايضا ليس ما ذكرتي فقط بل وحدة تتزوج بوليد ولايتها تعرفو وتعرف عقليتو و التقاليد تاعهم اما خارج الولاية راح توقع في مشاكل بزاف خاصة لو كانت مع العايلة فالتقاليد مايتشابهوش خلاص
السلام عليك و رحمة الله تعالى و بركاته
أختي أم إيمان بعض هذه الأمور تحدث حتى و لو تزوجتي قريبا في ولايتك يعني إذا تزوجتي شخص من نفس ولايتك لكنه يسكن في مدينة أخرى أهلك راح يحضرولك اللازم .
المهم في الزواج عقلية الرجل و دينه و أخلاقه
السلام عليكم
اولا ,,,,,,,,,,,شكرا على النصيحة
ولكن الامور لاتحسب هكذا ,,,,,,,ولايجب ان نراها بهذا الشكل ,,,,,,,,بمعنى ,,,,,كل شخص وحياته وقدره ,,,,,,,وان حدث هذا لك ليس بالضرورة ,,,,,,,ان يحدث هذا لاخريات
وكذلك ,,,,,,,لايوجد شخص يخلو من المشاكل ,,,,,,,ولكن الاختلاف يكمن في تفكير الاشخاص ورؤيتهم للامور وكيفية التعامل معها ,,,,,,,فمن ارادا ان يعقدها ,,,,,,,,سيعقدها ,,,,,,,,,,,ومن اراد ان يبسطها ,,,,,,سيبسطها
ربي يهنيك ويسعدك
السلام عليكم
اريد ان اقول لكي مش دائما يحدث هذا احنا والله عدنا لي تكون مش من ولا يتنا نتهلاو فيها احسن من لي منا مؤخرا سكنت جارة بحذانا كارية فقط عروس جديدة ومن لي سمعناها بالحمل كامل الجيران كل يوم يطيبولها ونتفقدو فيها وكاين لي قال لزوجها سيارتي تحت امرك لي تحتاجها رانا هنا وانا زوجت اخي من ولاية اخرى والحمد لله منشكرلكش بصح هذا الامور ترجع لكل واحد واصلو انا في نظري لي تكون مش من ولايتها هذي لي تحتاج اهتمام اكثر وحنانة سواء من الزوج او من الاهل نحاولو نعوضولها فراق الاهل بالاهتمام
السلام عليكم ورحمة الله تعالى.
أنا رايحة لولاية بعيدة
هذا الكلام سمعتو وكرهتو واحفظتو بصح علاه ياك مايحبوهاش لبنتهم. ….
سلام…لماذا هذا التشاؤم اختي عائشة….تجربة واحدة فاشلة لاتعني فشل التجارب الأخرى…عن نفسي فاني طيب جدا بشهادة من يعرفونني و أهلي طيبون ايضا ولا أقبل أن أظلم زوجتي إن شاء الله تعالى…لا أخيتي فليس كل الناس لديهم نفس الأخلاق والتربية…ربي يهنيك مع زوجك الكريم…أخوك سفيان
احنا عندنا بنات (صادرات ) خارج الولاية و عايشييييييييييييييييييين بسعادة كبييييييييرة تع افلام و عندهم الكثير من الذراري
و جايبين كناين (واردات ) من ولايات اخرى و مقلشين عندنا و كي يقولو هاذ الهدرة قدامي ……….. بصراحة نقولهم لوكان جا البعد مش مليح ماراكمش عندنا …………… نبهدلهم …….لان كي يكتبلك ربي في ناس ملاح و تكوني مليحة (انت تبادري بالملاحة ) ما تلقاي حتى بروبلام
احترامي
الزواج قسمة ونصيب
نعيب المكان والزمان والعيب فينا…وما للمكان من عيب سوانا
كثيرات من فتيات الشمال متزوجات في الصحراء حيث تختلف البيئة الجغرافية والاجتماعية ..ومنهم من نجح والعكس
لانعطي صورة سوداء الى هذا الحد
انا مزوجة لولاية بعيدة على ولايتي بالسيارة تقريبا 7 سوايع مرات نحس روحي وحدي برغم انو عندي 10 سنين زواج بصح اوقات نحتاج لاهلي كيما قلتي في مرض او كي واحد من اولادي يدخل المستشفى ما نلقى حتى واحد و راجلي مسكين يشيط بين الخدمة و الدار و السبيطار بصح هادا كامل ننساه كي نعودو متلايمين انا و زوجي و اولادي الحق هو ماشي منقص معايا يديرلي واش نسحق و اكثر بصح يقعد الحنين لدارنا و لاهلي و ربي يجيب اللي فيه الخير
السلام عليكم انا صاحبة تجربة و نقولك الشي اللي راكي تحكي فيه صحيح و لكن مكتوب ربي فوق كلشي و الراجل كي يكون وليد حلال تصبري معاه و ترفدي و هذي هي الدنيا كل واحد و قسمتوا
ليس بالضرورة
و كذلك
يقااااال
دمك هو همك
و الفاميليا قد ما تبعدي عليها ترتاحي
و في كلتا الحالتين ليس بالضرورة !
بالعكس تماما نحن في ولاية بسكرة العرايس اللي يجيبوهم من خارج الولاية يحطوهم فوق روسهم حتى العروس تتمادى واللي ما داراتوش في ولاياتها سابقا ديرو في دار راجلها وعندي امتلة عديدة على ذلك حتى تخمم تجيب اخواتها عرايس لسلافها واقارب راجلها وتحاول بكل الطرق لفعل ذلك